Psa 57 | MMX | STEP | O Moroa, una belemumu ia. Una lox asuusu lebelemumu ria, atla nia a vot pasa u xusu una kubak pe ia. Una kox avukar ia maxopok at lamamau at luvapa ram. Una lok ngan lavatban tia, se at nom laaleng na levenmumuat axap na on basinge ia.

Psalms 57

Lisingising Ti Loklok Tooro

1 O Moroa, una belemumu ia. Una lox asuusu lebelemumu ria, atla nia a vot pasa u xusu una kubak pe ia. Una kox avukar ia maxopok at lamamau at luvapa ram. Una lok ngan lavatban tia, se at nom laaleng na levenmumuat axap na on basinge ia.

2 Nia a toro ri ne Moroa, ni Leeme Avolo, mo im taba ia mi lempanga axap nia ak pakes tin. 3 Ni naba vaase porang ia boro vana at laxalibet la naba lox asepsu ia; ni naba sev asi axap limixin di esep minia. Moroa naba lox asuusu mo labalamu lexen la naba lox epovo levengkakaape ren tia.

4 Nia ak lok kantubu at limixin munepen minia di lok ngan lubung laion; di lok gagas kusu dina sev amet limixin la dina anan di. Leven gisangsa atnedi i anan ngan ta lempatsoosoo, la leven gam atnedi i anan ngan ta lemparise esep.

5 O Moroa, una lox asuusu lolos silok taram to vana at lamavangkap, mi lisisixam taram at lengkot axap at na lavatbung menemen.

6 Limixin munepen minia dira sat pam laxatkat kusu dina rebeng alis kaka ia; lorooro rak i umsu mi levenmumuat i sak pava ia. Diga sep pe langas patpas tarak mi lavatmet i si aleng, ketla nedi xa diga subu tup teren.

7 O Moroa, nia a nuunu saga rinotno ram; nia anabak pixan la ana emi asu minu. 8 Lodoxoma rak, una xatu kaxat. Loxontaaleng tarak mi ligita, muna gagas. Nia anaba sak aus laxangking at labara koxot mi loxompixan. 9 O Leeme Silok, nia anaba tong loklok avukat tu ro melamgo at limixin at levenep silok. Nia anabak pixan emi asu minu ro melamgo at limixin axap. 10 Labalamu lexen taram i umsu aleng upana i se axa ro at laxalibet. Loklok tuturun taram i se tu at lamavangkap.

11 O Moroa, una lox asuusu leven gugu silok taram upana at lamavangkap, la una lox asuusu lisisixam taram at levengkot axap at na lavatbung menemen.